Sujet sur Uzeu copene:Lucyin/Structured Discussions Archive 1

Divins S0, on trouve s(u)teûle a cawe (~ siteûle, siteûye), mins Francard nos el dene po ene sitoele filante, nén pol comete.

Come dji n' a nén co acater l' novele modêye, serîz vs capåbe di nos dire c' est ene sacwè k' il a coridjî u si c' est todi l' minme definixha ?

Dji dmande çoula paski divins l' prumire modêye, Francard mete come egzimpe : On s’ dimèsfiye d’ lu pus’ ki dol siteûle a cawe, çou ki m' fwait pus sondjî a ene comete k' a ene sitoele filante, come divins l' ratourneure : ricrinde come li stoele a cawe. C' est bén cnoxhou ki c' est les cometes k' anoncèt les målaweures.

por mi, si on rmete ci definixha la dins l' wiccionaire, c' est avou li livea "tpbpv" (tot prindant boû po vatche)

Dins l' ALW 3 p. 42 (comète), on racsegne li nombe di viyaedjes ki ci definixha la a stî dné: 5 viyaedjes (so Sougniye, Twin, Tchålerwè, Nivele et a Måtche (el Fåmene) minme. A H45, gn a les 2 sinses.

Tot come les plantes, on pout mete tot les sinses dins l' Wiccionaire; dins l' Wikipedia: w:sitoele a cawe= comete [comète, coumète G203]; w:schitante estoele = étoile filante (sins mete le cmaxhaedjes).

dji rfondreu pus voltî "stoele al cawe", ki c' est ene emantchåjhe pus tipicmint walon (mågré k' elle n' a nén stî rascodowe po nosse sitoele a cawe (motoit paski l' sustantivire a stî foirdjeye e francès, divant d' passer e walon).

si çou ki s' dit c' est "stoele a cawe", adon c' est çoula k' i fåt mete dins l' Wiccionaire, et nén edvinter èn ôte mot.

Li rfondaedje, dj' ô bén li tchuze d' ene ortografeye dins l' sistinme lomé "rfondou walon" po on mot, c' est tchoezi ene cogne ortografike, nén candjî l' croejhete. Si on n' mete nén d' årtike, c' est insi.

(et, di pus, dji rsin "stoele a cawe" et "stoele al cawe" come diferins dins l' sinsiaedje.

• "XXX a cawe" : ene sacwè come XXX k' a-st ene cawe; pol restant c' est parey, des XXX end a avou cawe, des ôtes sins...
• "XXX al cawe" : c' est NÉN èn XXX come les ôtes, c' est onk bén pårticulî, li seu, li ci k' a-st ene cawe.

Est ki vos n' rissintrîz nén ene diferince etur "ome a båbe" et "ome al båbe" ? avou "ome a båbe" on djåze d' omes avou des båbes (eneviè les cis k' end ont nén) avou "ome al båbe" on djåze d' èn ome, c' est lu, cist ome la, k' on ndè djåze, nén l' fwait k' il a-st ene båbe (c' est djusse eployî po l' idintifyî, come on pôreut dire "li cinsî d' a costé", c' est nén do fwait k' il est cinsî, ni k' i vike a costé, k' on djåze; c' est djusse po bén fé comprinde di kî on djåze)

• E170 : steûle a quåwe (sinse: comete)
• E1 : steûle a cowe (comete)
• C8 : s(i)twèle à kèwe (comete)
• O4 : (è)stwèle à keûwe (comete)
• E212 : suteule a kawe (comete)
• R13 : stoele a cawe (comete)
• S0 : s(u)teûle a cawe (schitante sitoele)
• nén dins GO

(et c' est tos les cis ki dj' a-st a costé di m' buro) (a pårt E212 k' endè fwait ene intrêye da lu; les ôtes l' ont dizo "stoele")

i m' shonne clair ki c' est stoele "a" cawe et nén "al" cawe.

Mins pol sinse, dji rvént so çou k' dj' a dit; (cåzu) tos les motîs sont d' acoird sol sinse di "comete"

Dins l' eployaedje corant c' est l' minme diale : ene sacwè d' foirt loumiant ki passe dins l' cir, avou ene scheuve pa drî.

C' est purade "comete" k' est on mot pus spepieus avou on sinse pus stroet (les stoeles a cawe ki n' toumèt nén sol daegn mins passèt a costé, et rivni a etervales erîlés).

Dji metreut "stoele a cawe" come rascovrant les deus (avou les deus sinses)

Dji rdjond çou k' dit Pablo, dji n' risin nén del minme manire sitoele a cawe (sitoele avou ene cawe) et stoele al cawe (sitoele avou li cawe, cisse cawe la et nén ene ôte).