Wiccionaire:El savîz ?/5

E walon, li lete å, k’ on lome voltî A-bole, paski c’ est on a avou ene bole padzeu, a stî eployeye pol prumî côp divins l’ motî Haust (1933) po scrire les mots come åbe, k’ on prononce avou on ṑ /ɔː/ (ṑp) a Lidje et Vervî, et k’ on prononce avou on ā /aː/ (āp) el Hesbaye et Condroz. Divant, ces sons la estént scrîts å pus sovint avou on â (âbe), mins L. Remacle (1823) sicrît ces mots la di deus manires : â (âb) et aû (aûb). Divant Haust, on trouve cisse lete cial dins l’ croejhete Delaite (1892), mins ele n’ est waire eployeye, djusse po dire ki c’ est l’ minme son ki ṑ /ɔː/ a Lidje. Çou n’ est nén ene lete do sistinme Feller stricto sensu. Ele est rprindowe e rfondou walon (come betchfessî scrijha), so l’ idêye da Haust, mins eto po scrire les mots do walon do Mitan (Nameur) k’ on prononce avou on /oː/ (aube), et les cis do walon do Coûtchant (Tchålerwè, Nivele) k’ on prononce avou on /aː/ (ârbe) u /a/ (arbe).