sporon

Walon (Rifondou)

Alofômes di s(i)- / (e)s-

Cogne prumrece (dirî voyale)	Dispotchaedje (dirî cossoune)	Divanceye voyale (dirî cossoune)
sporon	siporon	esporon

Etimolodjeye

Tayon-bodje vî francike « sporo » (sporon po fé avancî les tchvås).

Prononçaedje

• AFE :
  • prononçaedje zero-cnoxheu : /spɔ.ˈʀɔ̃/ (minme prononçaedje pattavå)

Sustantif

singulî	pluriyal
sporon	sporons

sporon omrin

1. boket d’ fier metou après les botes cavalreces, k’ on pike li tchvå k’ on-z est monté dsu avou, po l’ fé avancî pus rade.
   • Li ptit Lorint, avou ses belès botes, ses sporons tot rglatixhants, et si coulote cavalrece esteut ttossu bea a raloukî ki les sôdårds so les cwåtes di novelan.
   • Des cårpeas, come s’ end alénxhe å lon,
     Dinèt des côps d’ talon
     Sins esporons ! — Jules Claskin, « Airs di flûte et autres poèmes wallons », édition critique de Maurice Piron, 1956, « C’èst l’ fièsse », 1912-1913, p.74 (fråze rifondowe).
2. (bateu d' cok) sôre di grawe ki les coks ont padrî leu pate, et s’ endè siervi po s’ bate.
   • Li cok si disfind avou ses sporons.
   • On cok k’ a des fameus sporons.
   • Divins les combats d' coks, mes djins tinoz l' po bon,
     Les pus dandjereusès biesses n' ont nén des esporons. — Jean Dessard, D'ine cohe so l'aute, 1939, p.153, Al bate di coqs (1923) (fråze rifondowe).
3. plante del sôre do pixholét, k’ on-z ahive co bén po gårni les cortis, ki l’ sincieus no, c’ est : Delphinium.
   • Dj’ avans semé ene airêye di sporons. — Motî Forir (fråze rifondowe).

• 
  (Sinse 1) Deus sporons.
• 
  (Sinse 2) Li sporon do cok est å limero 24.
• 
  (Sinse 3) Li fleur d’ on sporon.
• 
  (Ratourneure) Etikete « cok sins l’ walon, cok sins sporons ».

Ratourneures

(boket d’ fier)

1. C’ est l’ esporon ki fwait li tchvå : C’ est l’ cavalî ki fwait k’ on tchvå est bon u nén.
2. rôlete u stoele d’ esporon : rôlete avou des picants ki replaecèt li sporon a ene pike.
3. Batreye des sporons d’ ôr : batreye inte li Conte di Flande eyet li rwè d’ France.

(sôre di grawe do cok)

1. si dressî so ses sporons : esse presse a-z ataker.
2. il est vite so ses sporons : i s’ måvele åjheymint. On dit eto : i n’ a waire di cur.
3. diner on côp di sporon : escoursi ene sakî, renonder ene sacwè.
4. Walon sins l’ walon, cok sins sporons : spot waloneu, ki mostere ki, po s’ disfinde et esse foirt, les Walons ont dandjî d’ leu lingaedje.

Parintaedje

• spornî
• sporner

Sinonimeye

sôre di grawe di cok

• betchete

Ortografeyes

(sporon, siporon, esporon)

Après 1900, foû rfondou (Feller, Feller ricandjî, nén Feller) :

• èporon : O3
• spouron / sipouron : C8
• èsporon : E34
• sporon / èsporon : E1 ^(lére), O4

E rfondou walon :

• sporon : R13
• sporon / siporon u esporon : R10 ^(lére)

Ôtès ortografeyes (avou des sourdants nén rkinoxhous) :

• sporon : E187

Ratournaedjes

boket d’ fier

• Francès : éperon ^(fr)

sôre di grawe do cok

• Francès : ergot ^(fr)

plante

• Francès : pied-d’alouette ^(fr), dauphinelle ^(fr)

esse vite so ses sporons

• Francès : être susceptible ^(fr), hypernerveux ^(fr)

diner on côp di sporon

• Francès : donner un coup de pouce ^(fr), encourager ^(fr)

Waitîz eto

Lijhoz l’ årtike sporon so Wikipedia